Plantun de Prouvènço

Pèr coumpara dos planto d'encò nostre

Echinochloa oryzicola & Fissidens dubius

Echinochloa oryzicola

Poaceae Graminaceae

Noms en français : Échinochloé phyllopogon, Panisse noire.

Descripcioun :
La panisso-negro trachis dins li risiero de Camargo. Sèmblo proun au pèd-de-gau, pamens lou brout (paniculo) resto bèn dre sènso retoumba sus li coustat. Se destrìo tambèn dis àutri Echinochloa bonodi si noumbrous péu sus li bord di guèno di fueio e sa grosso barbo au nivèu de la lengueto (vèire li fotò). Pensa de coumpara emé lis àutri panisso de risiero.

Usanço :
Aquesto planto, que nous vèn d'Asìo troupicalo, s'atrovo soulamen dins li risiero qu'èi samenado emé lou ris. Adounc, au contro dóu pèd-de-gau, fai pas de gròssi poupulacioun e se vèi d'un biais regulié. Pèr acò èi tihous de lucha contro èlo.

Port : Grando erbo
Taio : 30 à 150 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Echinochloa
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 13 à 18 cm
Flourido : Estiéu

Sòu : Ca
Autour basso e auto : 0 à 50 m
Aparado : Noun
Avoust à óutobre

Liò : Risiero
Estànci : Mesoumediterran
Couroulougi : Óurigino Asìo troupicalo
Ref. sc. : Echinochloa oryzicola (Vasinger) Vasinger, 1934 (= Echinochloa phyllopogon sensu auct. = Echinochloa oryzoides subsp. phyllopogon (Stapf) Tzvelev, 1968 )

Mousso-divisado-doutouso

Fissidens dubius

Fissidentaceae

Nom en français : Fissident crête-de-coq.

Descripcioun :
Aquelo mousso dóu gènre Fissidens (peristome divisa, vèire li fotò) trachis sus li roco cauquiero e de cop que i'a au sòu. Es uno mousso pulèu pichoto auto de 1 à 3 cm. Fai partido dóu group qu'a ges de lòngui celulo sus lou bord de la fueio (fotò), pamens se vèi bèn uno bando de 3 à 4 cellulo pu claro. Se recounèis tambèn à sa pouncho de fueio emé un benc e que la costo s'acabo just avans lou bout (fotò). Es couneigudo pèr pas faire trop d'espouroufite, pamens sèmblo pas trop lou cas au nostre.

Usanço :
Se pòu counfoundre emé d'àutri meno dóu meme gènre subretout Fissidens taxifolius qu'a pas lou bout de fueio denta d'un biais irregulié e peréu que la costo vai fin qu'au bout dóu bènc (de vèire au microuscope).